Skrifað af: Brekmundur
Laugardagur, 28. janúar 2012 13:32
Uppstillingin gegn Fulham kom nokkuð á óvart en Denis Stracqualursi fékk að byrja frammi ásamt Cahill og Gueye var á vinstri kantinum. Kannski kominn tími til að hvíla Saha sem hefur á tímabilinu ekki náð fyrra formi en valið á Gueye kom svolítið á óvart þar sem flestir bjuggust við að Drenthe fengi tækifæri til að byrja leikinn. Að öðru leyti óbreytt frá því síðast, Hibbert á bekknum og því Neville áfram hægri bakvörður og Duffy áfram í miðverðinum en Moyes hafði verið að spá í að spila Hibbert í miðverðinum þar sem hann er meiri reynslubolti en Duffy. Sem betur fer reyndist ekki þörf á því og Duffy átti enn einn fína leikinn í vörninni. Á bekknum: Hahnemann, Hibbert, Drenthe, Saha, Vellios, Anichebe, Baxter (sóknarbekkur).
Leikurinn byrjaði ágætlega og við vorum sterkara liðið frá upphafi, spiluðum einbeittir og þó nokkuð í sókn. Það virðist samt loða við okkur á tímabilinu að við fáum á okkur mark í fyrsta skipti (og stundum eina skiptið) sem andstæðingurinn fær almennilegt færi og þessi leikur engin undantekning. Í þetta skiptið á 14. mínútu þegar þeir náðu upp við marklínu vinstra megin við markið, á sóknarmann Fulham fyrir framan markið sem skýtur að marki sem Heitinga ver með líkamanum og fer í hendina hans. Víti. Murphy tekur vítið og sendir Howard í vinstra hornið og skorar í það hægra. Hann þar með 100% nýtingu úr síðustu 12 vítum. Staðan 0-1 fyrir Fulham, þvert gegn gangi leiksins.
Við brugðumst vel við því að lenda undir og héldum pressunni á Fulham, fengum hverja hornspyrnuna á fætur annarri og áttum nokkur færi, meðal annars flottan skalla frá Duffy sem var varinn á línu. Duffy, sem hefur verið að standa sig vel í vörninni, hefur einnig í síðustu leikjum sýnt það að hann er hættulegur í hornunum en hann hefur verið nálægt því að skora í að ég held öllum leikjum hans á tímabilinu. Cahill átti skalla og Gueye skot en náðum ekki að skora. En stuttu síðar (á 27. mínútu) uppskárum við laun erfiðisins þegar Neville sendir boltann upp völlinn hægra megin yfir á Donovan sem hleypur upp að vítateignum hægra megin en stoppar svo snögglega og sendir með vinstri fæti fyrir markið, beint á hausinn á Stracqualursi sem skallar boltann á fjærstöngina framhjá markverðinum og inn í markið. 1-1. Fyrsta mark Stracqualursi fyrir Everton. Langþráð og mikilvægt mark. Vonandi mörg fleiri á leiðinni.
Við héldum áfram pressunni og vorum mun betri það sem eftir lifði hálfleiks. Ruiz átti reyndar skot sem Howard varði vel en Fellaini og Donovan voru ekki langt frá því að bæta við mörkum með skotum utan við teig en þar við sat, 1-1 í hálfleik.
Í seinni hálfleik batnaði leikur Fulham nokkuð og meira jafnræði með liðum í færum þó ekki væru þau of mörg. Dempsey átti skot hátt yfir (ekki hans besti leikur). Donovan átti gott skot sem fór fram hjá og Gibson átti fyrirgjöf sem enginn náði til.
Á 73. mínútu höfðum við þó erindi sem erfiði og markið var eiginlega eftir nákvæmlega sömu forskrift og fyrra markið. Neville tók aukaspyrnu fljótt upp hægri kantinn á Donovan sem gaf fyrir markið. Í þetta skiptið beint á hausinn á Fellaini á fjærstönginni sem skallaði boltann yfir markvörðinn og í hornið. Óverjandi. Staðan 2-1.
Tim Cahill var næstum búinn að skora þriðja markið þegar hann sendi fastan skallabolta í slána eftir sendingu frá Neville en þar við sat. 2-1 urðu úrslitin og Goodison bölvun Fulham liðsins heldur áfram. Þeir hafa ekki unnið okkur á Goodison síðan 1975. Við höfum þó ekki miklar áhyggjur af því enda komnir í 16 liða úrslit í FA bikarnum og bíðum spenntir eftir því hverjir mótherjar okkar verða.
Sky Sports gefur ekki út einkunnir fyrir bikarleiki en á heildina litið var þetta fínn leikur hjá öllum Everton leikmönnum, Donovan og Fellaini stóðu upp úr, Fellaini maður leiksins að mínu mati.
Skrifað af: Brekmundur
Föstudagur, 27. janúar 2012 12:54
Þá er komið að fjórðu umferð FA bikarsins en við mætum Fulham á heimavelli í kvöld klukkan 20:00. Við unnum þá á útivelli, fyrr á tímabilinu 1-3 með mörkum frá Drenthe, Saha og Rodwell. Þetta var eiginlega harla óvenjulegur sigur þegar sagan er skoðuð því fyrir utan einn annan útisigur Everton á Fulham (og eitt 0-0 jafntefli í fyrra á Craven Cottage) þá þarf að fara aftur til tímabilsins 1974/75 (samtals 22 leiki) til að finna leik þar sem heimaliðið _vann_ ekki. Vonandi heldur það áfram í kvöld, en við bindum helstu vonir okkar á tímabilinu við gott gengi í FA bikarnum. Við erum taplausir á móti Fulham í síðustu fjórum leikjum (3 sigrar, 1 jafntefli) en Fulham hefur þó aldrei frá upphafi lotið í lægra haldi fyrir Everton í FA bikarkeppninni. Liðin hafa dregist saman í FA bikarnum á fjórum tímabilum síðan 1925 og þrisvar þurft að endurtaka leikinn. Við töpuðum síðast fyrir Fulham á heimavelli tímabilið 1974/75, en það var einmitt síðast þegar þessi lið áttust við í FA bikarnum.
Fulham koma þó örugglega til leiks fullir sjálfstrausts eftir 5-2 sigur á Newcastle í síðustu viku þar sem Clint Dempsey var í fantaformi og skoraði 3 mörk. Gera má ráð fyrir að mikill áhugi verði fyrir þessum leik í Bandaríkjunum, enda þrír sterkir landsliðsmenn þeirra að spila leikinn (Dempsey, Donovan og Howard -- og reyndar Hahnemann mögulega á bekknum líka) en Dempsey og Donovan hafa þótt einna mest spennandi af bandarísku leikmönnunum undanfarið.
Meiðslalistinn er svipaður og hann hefur verið þó Hibbert sé líklega orðinn góður en hann var á bekknum í síðasta leik gegn Blackburn. Einnig spilaði Barkley með U18 ára liði Everton á dögunum. Bily var aftur á móti seldur á dögunum til Spartak (eins og fram hefur komið), þó enn vanti lokastaðfestingu á að salan sé gengin í gegn. Eftir sem áður eru Coleman, Osman, Jagielka, Distin og Rodwell líklega enn meiddir. Hjá Fulham eru Dembele, Orlando Sa, Mark Schwarzer og Grygera frá vegna meiðsla.
Þar sem tæplega hálft byrjunarliðið er enn á sjúkralistanum og þegar litið er til þess að Saha og Drenthe gekk mjög vel gegn Fulham síðast er líklegt að byrjunarliðið verði svipað og gegn Blackburn, nema að Drenthe fær líklega tækifæri í byrjunarliðinu á kostnað Anichebe. Þar með myndi liðið líta svona út: Howard, Hibbert, Duffy, Heitinga, Baines. Miðjan: Fellaini og Gibson, Drenthe á vinstri kanti, Donovan á hægri og Cahill fyrir aftan Saha frammi. Moyes var reyndar að velta fyrir sér hvort hann ætti að setja Hibbert í miðvörðinn í stað Duffy, þar sem Duffy er alveg reynslulaus en aðeins tíminn mun leiða það í ljós hvort það verði raunin og hvort það reynist rétt ákvörðun. Ég vona að Duffy fái að spreyta sig og hann standi sig með sóma.
Í heild sinni lítur 4. umferðin í bikarnum svona út (deild liðs innan sviga):
Föstudag:
Everton (1) vs Fulham (1)
Watford (2) vs Tottenham (1)
Laugardag:
QPR (1) vs Chelsea (1)
Liverpool (1) vs Man Utd (1)
Blackpool (2) vs Sheffield Wed (3)
Bolton (1) vs Swansea (1)
Derby (2) vs Stoke (1)
Hull (2) vs Crawley Town (4)
Leicester (2) vs Swindon (4)
Millwall (2) vs Southampton (2)
Sheffield Utd (3) vs Birmingham (2)
Stevenage (3) vs Notts County (3)
West Brom (1) vs Norwich (1)
Brighton (2) vs Newcastle (1)
Sunnudag:
Sunderland (1) vs Middlesbrough (2)
Arsenal (1) vs Aston Villa (1)
Skrifað af: Brekmundur
Þriðjudagur, 24. janúar 2012 16:04
Everton staðfesti formlega í dag að samningaviðræður stæðu nú yfir varðandi sölu á rússneska miðjumanninum Dinyar Bilyaletdinov en vonast er til að þeim ljúki á innan við tveimur dögum.
Bily, eins og hann hefur verið kallaður, kom til okkar frá Lokomotiv í ágúst 2009 fyrir um eða yfir 9M punda og lofaði góðu á fyrsta tímabilinu, skoraði m.a. 7 mörk, þmt. glæsimark gegn Man United, en á næsta tímabili fækkaði tækifærunum með byrjunarliðinu og var hann oft fyrsti maðurinn út af þegar Moyes var ósáttur við gang leiksins. Hann skoraði 9 mörk í 77 leikjum, og átti það til að skora helst aðeins glæsimörk eins og markið gegn Úlfunum á síðasta tímabili bar vitni.
Bily spilaði reyndar oftast á vinstri kanti en ekki í sinni hefðbundinni stöðu, í holunni fyrir aftan sóknarmanninn (staða sem hefur verið eignuð Tim Cahill undanfarið). Hann fékk þó nokkur tækifæri til að spila "sína" stöðu á miðjunni en það virtist þó ekki breyta allt of miklu í frammistöðu hans og oft eins og hann væri farþegi í leikjum.
Sumir vilja einfaldlega meina að enski boltinn henti honum illa en hann líkti sjálfur enska boltanum við að lenda í þvottavél. :) Bily sagðist jafnframt þurfa að fá að spila reglulega til að komast með Rússum á Evrópumeistaramótið. Þetta hefur því legið í loftinu um nokkurt skeið.
Enn á víst eftir að semja um söluverðið en fréttamiðlar hafa getið sér til um að það verði í kringum 5M punda. Vonandi verður hægt að nýta þá fjármuni í að styrkja liðið en við erum sérstaklega fáliðaðir í miðverðinum þessa dagana og skortir góðan markaskorara, en í báðum þessum stöðum erum við með menn (Distin og Saha) sem eru við efri mörk á aldri þegar litið er til hefðbundins fótboltaferils.
Í öðrum fréttum er það helst að Tim Howard bætti á laugardaginn met Neville Southall, í leikjafjölda í Úrvalsdeildinni með því að spila sinn 208. leik milli stangana. Hann kemst þó varla með tærnar þar sem Southall hafði hælana í heildarleikjafjölda, því Southall spilaði 578 leiki með Everton. Geri aðrir betur!
Skrifað af: Brekmundur
Sunnudagur, 22. janúar 2012 11:54
Everton mætti Blackburn á heimavelli í gær við erfið skilyrði en það bæði rigndi og var vindasamt á meðan á leik stóð.
Liðið var svipað og mætti Aston Villa, nema hvað Anichebe fékk að byrja leikinn (á vinstri kanti). Vörnin: Howard, Neville, Duffy, Heitinga, Baines. Miðjan: Fellaini og Gibson (sem fékk sitt fyrsta heimaleikjastart ásamt Duffy), Donovan á hægri kanti, Anichebe á vinstri, og Cahill fyrir aftan Saha frammi. Á bekknum: Mucha, Hibbert, Bily, Drenthe, Strac, Gueye og Vellios.
Við fengum fyrsta almennilega færi leiksins þegar Donovan sendi fyrir markið af hægri kanti en Anichebe á fjærstöng hitti boltann illa í ákjósanlegu færi. Það voru þó Blackburn sem léku betur í leiknum og fengu fleiri færi í fyrri hálfleik. Til dæmis voru þeir óheppnir að komast ekki yfir í upphafi leiks þegar Howard varði skot frá Dunn með fætinum niðri í vinstra horni. Baines varði síðar á marklínu skalla (frá Goodwillie að ég held).
En á 24. mínútu gerist það að Anichebe gerir vel í að vinna lausan bolta inni í teig Blackburn vinstra megin við markið. Hann sendir út á kantinn á Baines sem, aldrei þessu vant, ákveður ekki að senda fyrir markið heldur stutt á Donovan sem beið eftir boltanum við horn vítateigs vinstra megin. Donovan sendir hátt inn í teig, á hausinn á Fellaini sem er beint fyrir framan markvörðinn sem ver skallann frá Fellaini. Frákastið fer hins vegar aftur til Fellaini sem er virðist nokkuð brugðið og slengir höndinni í boltann sem breytir um stefnu við það og fer frá honum og yfir til Cahill (sjá mynd) sem á ekki í nokkrum vandræðum með að setja boltann í netið gegnum fæturna á leikmanni Blackburn. Mikill léttir að sjá hann skora eftir ótrúlegt heilt ár af markaþurrð. Hefðum auðveldlega getað verið 0-2 undir á þessum tímapunkti en í staðinn komnir 1-0 yfir en þetta var farið að líkjast svolítið fyrri leiks okkar við Blackburn, þar sem þeir voru betri, áttu fullt af færum og tvö víti en skoruðu úr hvorugu og fengu svo á sig suckerpunch (víti frá Arteta).
Blackburn létu ekki bugast og voru næstum búnir að jafna þegar Dunn átti stangarskot og Cahill var næstum búinn að skora annað mark með skalla en Robinson varði vel.
Í seinni hálfleik héldu Blackburn pressunni áfram en færin létu á sér standa. Petrovic reyndi skot á markið en rétt fram hjá. Drenthe kom á 54. mínútu inn á fyrir Saha (sem hafði ekki verið atkvæðamikill í leiknum) og Drenthe skapaði ákjósanlegt færi þegar hann brunaði upp og sendi frábæra sendingu fyrir markið og framhjá öllum varnarmönnum og markverði Blackburn. Vantaði bara einhvern jafn fljótan og Drenthe til að taka við boltanum.
Við hefðum betur nýtt það færi því á 72. mínútu gerðist það að Blacburn sendir inn í teig þar sem Howard stekkur upp til að grípa boltann en rekst í leikmann Blackburn (ekki brot) og nær ekki að halda boltanum sem berst til aftasta manns (Cahill) sem reynir að hreinsa en skýtur í Goodwillie sem fær hann í hendina og skorar. Bæði lið þar með búin að skora eftir að hafa handleikið knöttinn. Staðan 1-1.
Við náðum upp svolítilli pressu aftur í lokin en þá var Shane Duffy óheppinn að skora ekki með flottum skalla sem fór í slána og út. Blackburn átti svo skot sem fór rétt fram hjá áður en þeir hreinsuðu tvisvar á línu, í fyrra skiptið eftir skalla frá Fellaini og síðar skot frá Straqualursi.
1-1 jafntefli svo sem ekki slæm hlutskipti með 6-7 menn úr aðalliðinu meidda og svona þegar horft er til færanna í leiknum og þess að Blackburn liðið lék betur. Jafnframt ekki laust við að maður sé þakklátur fyrir að komast í gegnum leikinn án þess að neinn meiddist. :) Vona bara að Cahill sé farinn að skora aftur.
Frústrerandi að horfa upp á Saha ströggla frammi enn einn leikinn og Drenthe sýndi aftur hvað hann getur verið mistækur en hann átti fína spretti inn á milli klaufalegra brota og þess þegar hann skaut boltanum í bræðiskasti upp í stúku eftir að dómarinn var búinn að flauta. Hefði þar með átt að fá sitt annað gula spjald en dómarinn sleppti því. Jafnframt var þetta einn slakasti leikurinn sem Donovan hefur spilað undanfarið, þó hann, ásamt Anichebe og Fellaini hafi átt stóran þátt í marki okkar. En það voru ljósir punktar líka. Loksins mark hjá Cahill. Duffy kom vel út í vörninni. Fellaini út um allan völl og að komast í dauðafæri. Við þurfum þó að leika betur sem lið og gera mun betur ef við eigum að sigra Fulham í bikarnum á föstudaginn en þeir tóku Newcastle í bakaríið á heimavelli í gær, 5-2.
Einkunnir Sky Sports: Howard 5, Baines 5, Heitinga 5, Duffy 7, Neville 6, Gibson 5, Fellaini 6, Donovan 6, Anichebe 5, Cahill 6, Saha 4. Varamenn: Drenthe 6, Vellios 3, Stracqualursi 3. Leikmenn Blackburn komu mun betur út úr einkunnagjöfinni og áttu það skilið. Um helmingur með 6, hinn helmingur með 7, einn með 8.
Skrifað af: Brekmundur
Fimmtudagur, 19. janúar 2012 12:50
Á morgun klukkan 15:00 mætum við Blackburn á heimavelli en þeir hafa verið að sýna ákveðin batamerki á leik sínum undanfarið. Blackburn hafa hægt og bítandi verið að vinna sig upp úr fallsætunum eftir jafntefli við Liverpool (á Anfield) og sigur á Man United (á Old Trafford) nýverið og svo sigur á Fulham á heimavelli í síðustu viku -- í leik þar sem Yakubu var rekinn út af (sjá mynd).
Hann missir því af leiknum gegn okkur á morgun, sem er ágætt þar sem hann hefur verið duglegur að skora á sínu fyrsta tímabili með Blackburn. Því þykir líklegt að nýi láns-sóknarmaðurinn þeirra, Anthony Modeste frá Bordeaux, fái að spreyta sig í fyrsta skipti á morgun, þó ekki nema sem varamaður. Jafnframt þarf Steve Kean, þjálfari Blackburn, að ákveða hvað hann á að gera við Chris Samba, miðvörðinn sterka, sem lagði inn beiðni í vikunni um að verða seldur. Það ætti ekki að verða til þess að bæta vörnina hjá Blackburn sem hafa ekki haldið hreinu í neinum leik á tímabilinu (eftir að hafa spilað 21 deildarleiki, svo ekki sé minnst á aðra leiki).
Meiðslalistinn hjá okkur er svipaður og verið hefur (hálft byrjunarliðið á sjúkralistanum): Osman, Jagielka, Coleman, Rodwell, Barkley, Distin og Hibbert. Af þessum er Hibbert líklegastur til að spila en hann byrjaði að æfa aftur í vikunni. Að öllum líkindum verður Duffy áfram í vörninni, nýi miðjumaðurinn, Gibson, fær annan leik en Anichebe verður áfram á bekknum því Moyes vill passa að álagið á hann sé ekki of mikið eftir að hafa unnið sig upp úr erfiðum meiðslum.
Í öðrum fréttum er það helst að Leighton Baines var valinn leikmaður desembermánaðar fyrir Everton en á þeim tíma lék mjög vel gegn Stoke, Arsenal, Sunderland og Norwich og skoraði víti gegn Sunderland sem tryggði stig. Einnig skipti James Wallace um lánslið úr Stevenage yfir í Tranmere, en það er einmitt liðið sem Jose Baxter lék fyrir fyrr á tímabilinu.
Síða 1 af 66
« FyrstaFyrri12345678910NæstaSíðasta »
