Everton á Íslandi

Darron Gibson kominn til Everton

Skrifað af: Brekmundur Föstudagur, 13. janúar 2012 11:00

Darron Gibson, fyrrum miðjumaður hjá Man United, var að skrifa undir samning hjá Everton til fjögurra og hálfs árs (sumars 2016) og mun fá skyrtu númer 4. Þar sem gengið var frá félagaskiptum fyrir hádegi í dag er hann löglegur gegn Aston Villa á morgun í Úrvalsdeildinni. Kaupverðið var ekki gefið upp en í blöðum hefur verið rætt um upphæðir á bilinu 500þ - 2.5M pund (líklegast nær neðri tölunni en þeirri efri).

Gibson var kjörinn ungliði ársins hjá United tímabilið 2005/06 (þá 18 ára) og írski ungliði ársins árið 2009. Hann er nú 24 ára, var uppalinn hjá Man United og komst í aðallið þeirra tímabilið 2005/06 en hefur síðan leikið 60 leiki fyrir þá og skorað 10 mörk, mörg hver mjög glæsileg eins og sjá má á þessu Youtube myndbandi. Hann er írskur landsliðsmaður og hefur skorað 1 mark í 17 leikjum með Írum en sagt var að Giovanni Trapattoni, þjálfari þeirra, hefði rætt við Gibson og sagt að hann yrði að fá að spila meira í Úrvalsdeildinni til að vera valinn í liðið. Miðað við lengd sjúkralistans hjá okkur hlýtur hann að fá tækifæri von bráðar.

Hann er því annar leikmaðurinn sem skrifar undir í janúarglugganum (á eftir London Minivan) og bjóðum við hann hjartanlega velkominn.